Nga Albert Zholi

INTERVISTË/ Flasin vëllezërit Panajoti Simsia, i njohur në grup me pseudonimin BKZ, Odisea Simsia i njohur si ODC dhe Emiljano Hoxha, në art Amilli. Çfarë kuptimi ka emri i grupit dhe si u krijua. Nga vijnë dhe çfarë kërkojnë “çunat e hedhur” të bregdetit

 

Ata janë tre djem të rinj në moshë dhe si të tillë, si të gjithë moshatarët edhe ata kanë ëndrrat dhe dëshirat e moshës rinore. E duan artin, muzikën, këngën dhe, meqenëse rryma hip hop po përhapet edhe në vendin tonë veçanërisht edhe ata tre djem menduan të këndojnë dhe të krijojnë grupin e tyre, që e kanë titulluar: B.O.B. (“Blazed Out Boys”  )

Dy prej tyre janë vëllezër, Panajoti Simsia, i njohur në grup me pseudonimin BKZ,  Odisea Simsia, ODC dhe Emiljano Hoxha, Amilli.

Edhe pse nuk janë lindur në Shqipëri, të rritur në një nga lagjet e Nju Jorkut, vëllezërit Panajoti dhe Odisea Simsia, janë kthyer përkohësisht në Shqipëri, në Durrës, ku edhe 

vazhdojnë të banojnë, u njohën me shokun e tyre durrsak, Emiljano Hoxha.

Muzikën e kanë në gen, sepse në rininë e tyre edhe baballarët e tre djemve janë marrë me muzikë. Dhe ata, menduan të ecin në rrugën e baballarëve të tyre, por në një rryme tjetër të re, në hip hop. Kanë patur bashkëpunim edhe me grupin: “Street Doggs”

Edhe pse grupi i tyre është ende i ri, ata kanë arritur suksese: Në Durrës, para një viti u zhvillua Hip-Hop Competition në Pallatin e Sportit “Ramazan Njala”, dhe grupi i tyre u vlerësua me çmimin e dytë.

Para pak kohësh, po në Durrës u zhvillua spektakli “Miss dhe Mister Durrësi”. Grupi i djemve B.O.B. ishte i ftuar në atë spektakël, madje edhe bënë hapjen e atij spektakli me një nga këngët e tyre, edhe video klipi i parë i tyre, “So Fly”.

Suksesin më të madh ata e arritën këto kohët e fundit në  Festivalin e 11-të të Videoklipit Shqiptar (Netët e Klipit Shqiptar). organizuar nga Televizioni Shqiptar, ku grupi i tyre, në bashkëpunim me grupin Street Doggs fituan çmimin “Videoklipi më i mirë për vitin 2012” me “Best Hip-Hop”.

 

Mund të bëni një prezantim të shkurtër vetes suaj? Kush jeni dhe nga vini?

Vëllezërit Panajoti dhe Odisea Simsia: Përkatësisht, 19 dhe 17 vjeç. Edhe pse ne nuk jemi lindur në Shqipëri edhe jemi rritur në Nju Jork, ndjehemi krenar që jemi shqiptarë. Babin e kemi me origjinë nga Berati, ndërsa mami me origjinë nga Durrësi. Jemi kthyer nga Nju Jorku përkohësisht para pak vitesh dhe vazhdojmë të jetojmë në apartamentin tonë në Durrës.

Të dy ne vëllezërit jemi tipa të qetë. Respektojmë njerëzit. Ajo më kryesorja për ne është se, si dy vëllezër që jemi, kemi një harmoni, dashuri ndaj njeri tjetrit. Gjithmonë bashkë jemi të pandarë, pra, jemi edhe vëllezër edhe shokë.

Me muzikën, pothuajse jemi rritur qysh fëmijë. Prindërit tanë e ndjejnë shumë muzikën, veçanërisht babi i cili edhe e ka interpretuar.

Emiljan Hoxha: Jam 18 vjeç. Jetojmë në Durrës me familjen. Me origjinë jemi nga Tepelena. Jam tip i qetë, i respektueshëm me njerëzit. Më pëlqen të jem gjithmonë i qeshur me të gjithë njerëzit.

 

Si ju lindi ideja për të krijuar një grup muzikor hip hop?

Vëllezërit Simsia:  Me shoqërinë tonë në Nju Jork dëgjonim këngë të ndryshme, por ajo që na tërhoqi dhe na pëlqeu më tepër ishte rryma hip hop. “Eminem”, “2 pac” edhe “50 cent” i  kemi dëgjuar shpesh, madje akoma i kemi CD e ndryshme të tyre. Me ardhjen tonë në Durrës, u njohëm në shkollë me Emiljanin, i cili edhe ai si neve e pëlqente atë rrymë jo vetëm për ta dëgjuar, por edhe për ta kënduar. Biseduam dhe menduam të krijojmë edhe ne grupin tonë.

Emiljani: Ideja ishte diçka spontane por e rëndësishmja është se ne të tre e ndjejmë shumë muzikën, jo vetëm për ta dëgjuar, por edhe për ta interpretuar atë.

 

Grupi juaj quhet B.O.B. Pse ky titull dhe çfarë do të thotë?

B.O.B. që në gjuhën angleze thuhet Bi Ou Bi janë shkronjat e para: “Blazed Out Boys”  dhe që do të thotë pak a shumë: Djemtë e hedhur, Çunat që shpërthejnë…

Menduam ta quajmë me këtë emër grupin tonë, sepse siç është edhe vetë titulli edhe ne menduam t’i përshtatemi, pra të jemi të hedhur, t’i kalojmë limitet,  të shpërthejmë pra edhe ne në talentin tonë…

 

Si i krijoni këngët dhe me kë bashkëpunoni?

Vëllezërit Simsia: Në fillim duam t’ju themi për bashkëpunëtorin tonë. Ky ishte edhe meraku jonë, më kë do bashkëpunonim për këngët? Rastësisht, në lokalin e kushërinjve tanë në Durrës erdhi një djalë për të pirë kafe, që për neve ishte i panjohur. Kushërinjtë tanë iu kujtua menjëherë që ai djali ishte muzikant, madje shumë i talentuar. Na prezantuan me muzikantin. Ai duke parë interesimin dhe dëshirën tonë, na ftoi në studion e tij diskografike “Doggs records”. Quhet Erti dhe që ka edhe ai grupin e tij: ” Street Doggs” Na provoi dhe mendoi se mund të ecnim në rrugën tonë të artit që ne e kishim menduar. Erti është producenti dhe menaxheri ynë gjithashtu.

Emiljani: Këngët i krijojmë në këtë mënyrë. Kompozitor Erti krijon vijën muzikore dhe na thërret neve për ta dëgjuar. Neve, nëse na pëlqen, vendosim që të krijojmë vetë tekstin e këngës që t’i përshtatet vijës melodike. Meqenëse për vëllezërit Simsia, mund të ketë vështirësi në rrjedhshmërinë e fjalëve dhe shprehje në gjuhën shqipe, ata i krijojnë tekstin në gjuhën angleze, ku edhe i këndojnë anglisht, ndërsa Emiljani i krijon dhe i këndon në shqip.

Me grupin “Doggs Records” kemi patur bashkëpunim ku edhe kemi realizuar një videoklip se bashku.

 

Në familjet tuaja, ka ndonjë pjesëtar që merret me muzikë?

Vëllezërit Simsia: Me muzikën, pothuajse jemi rritur qysh fëmijë. Babi ynë, jo vetëm që e ka kënduar muzikën shqiptare, por edhe e ka interpretuar në instrumentin e trombës. Kështu që edhe ne dy djemtë e tij nuk kishte pse të ishim ndryshe. Vetëm në rrymën tonë hip hop në të kënduar jemi ndryshe nga ai.

Emiljani: Edhe ne në familjen tonë e ndjejmë muzikën. Ashtu edhe unë jam rritur me muzikën në shtëpi, sepse edhe babi im ka qenë muzikant dhe ka patur edhe ai grupin e tij, por në një rrymë tjetër Pra, edhe unë pak a shumë e kam të  trashëguar.

 

Është i njohur grupi juaj dhe muzika që ju interpretoni?

Si fillim grupi jonë u bë i njohur në shoqërinë tonë, në shkollë, në lagje ku banojmë. Na kanë ndihmuar shumë aktivitetet e ndryshme familjare të miqve dhe shokëve, ditëlindjet e ndryshme, ku neve na është dhënë mundësia të këndojmë. Gjithashtu edhe shpërndarja e këngëve në web site në you tube në Internet. Këto edhe ndikuan që para një viti u zhvillua në Pallatin e Sportit konkursi “Hip-Hop competition”. Dhe në atë aktivitet u vlerësuam me çmim të dytë. (Best flow) Sigurisht, u ndjemë të lumtur e të gëzuar, sepse marrja e atij çmimi ishte edhe një nxitje për ne që të krijonim dhe të këndonim edhe në të ardhmen.

 

Keni qenë të ftuar në emisionin Zonë e Lirë në Televizionin KLAN që drejtohet nga Arian Çani…

Emiljani: Po, kemi qenë tek emisioni “Zonë e Lirë” që e drejton Arjan Çani. Ishte mënyra më e mirë për të perfomuar videoklipin tonë. Edhe atje u ndjemë shumë të emocionuar dhe të gëzuar, jo sepse ne atje prezantuam klipin tonë, por ishte një emision i drejtpërsëdrejti dhe për ne, ishte dalja e parë në televizor.

Vëllezërit Simsia: Tek “Zonë e Lirë” kishte shumë të papritura të këndshme për neve, por ne (Panajoti dhe Odisea Simsia)  e papritura e madhe ishte, sepse në atë mbrëmje atje ishte i ftuar edhe këngëtari i mirënjohur, Frederik Ndoci, mik i babit dhe i familjes sonë, që ne e kemi njohur që të vegjël në Nju Jork dhe e takuam atë pas disa vitesh. Sigurisht, jo vetëm që u gëzuam, por edhe u emocionuam shumë…

 

Si e ka pritur publiku grupin tuaj?

Publiku, shokët tanë, sigurisht, na kanë pritur shumë mirë, veçanërisht që kur kënduam këngën e parë, sepse për publikun ishte një stil komplet i veçantë i të kënduarit në dy gjuhët shqip-anglisht. Duartrokitjet që ne marrim, përshëndetjet e përzemërta kur ne ecim në rrugë, vlerësimet dhe komentet  e shumta që na bëjnë në youtube, tregojnë se publiku na pret mirë. Madje në youtube, ka edhe nga ata që na bëjnë komente pozitive, që ne nuk i njohim fare. I vlerësojmë dhe i falenderojmë të gjithë ata dëgjues dhe komentues.

 

Këto ditët e fundit, Televizioni Shqiptar organizoi Festivalin e 11-të të Videoklipit Shqiptar (Netët e Klipit Shqiptar). Ju në atë festival u vlerësuat me  çmimin: “Klipi më i mirë Best Hip Hop 2012″. Sigurisht, është një sukses i madh për juve. Si u ndjetë pas marrjes së atij çmimi?

Kur para një viti u vlerësuam me çmimin “Best Flow” në konkursin që u zhvillua në Pallatin e Sportit “Ramazan Njala” në Durrës, u ndjemë shumë të lumtur. Por marrja e këtij çmimi, e këtij titulli është një gëzim dhe lumturi për të gjithë neve që do na mbetet e paharruar në kujtesën tonë; pse jo edhe në jetën tonë. Marrja e atij trofeu ishin emocione dhe lumturi që rrallëherë përjetohet, sepse në atë festival ishin edhe emrat më të njohur të ekranit: Mc Kresha, Baba stars, 2 po 2. E falenderojmë jurinë e Festivalit për vlerësimin, sepse ai çmim është edhe një nxitje për ne në të ardhmen…

 

Besoj se, keni edhe ju fansat tuaj. Si i presin fansat tuaj këngët dhe veçanërisht këtë sukses të ditëve të fundit.

Sigurisht! Ne i kemi fansat tanë që në këngën e parë që krijuam dhe kënduam. Madje janë ata që edhe na mbështesin. Por pas marrjes së çmimit në Netët e Klipit Shqiptar, fansat tanë na “mbytën” me urimet dhe përshëndetjet e tyre, në rrjetet sociale, elektronike internetike. Madje edhe në rrugë na ndalojnë, shtrëngojmë duart, përqafohemi… I falënderojmë të gjithë me gjithë zemër për mbështetjen e tyre që na japin.

 

Keni ndonjë këngëtar tuajin të preferuar?

Këngëtarët tanë të preferuar janë “Eminem”, “2 pac”, “50 cent”. Gjithmonë na ka tërhequr muzika e tyre, zëri, interpretimi i tyre. Ata këngëtarë janë preferenca jonë por kjo nuk do të thotë se ne imitojmë ata. Ne të tre në këngë dhe në interpretim kërkojmë dhe duam të jemi vetvetja…

 

Cili është ushqimi juaj i preferuar?

Vëllezërit Simsia: Ne preferojmë çdo lloj ushqimi por për ne më e preferuara është pica, lazanja. Na mungon shumë edhe gjella kineze, pilaf me mish pule dhe brokoli, që në Amerikë është shumë e preferuar.

Emiljani: Unë nuk kam pretendime, preferoj çdo lloj ushqimi të ha.

 

Ju, Panajoti dhe Odisea thatë se nuk jeni lindur në Shqipëri, jeni rritur në Nju Jork dhe keni ardhur nga Nju Jorku të jetoni përkohësisht në Shqipëri, Durrës. Më lejoni t’ju pyes arsyen pse keni ardhur?

Nuk është diçka e fshehtë dhe sekrete që ne të mos e themi. Thjesht, ishte si fillim dëshira dhe mendimi i prindërve tanë që ne duhet të vinim për të jetuar përkohësisht në Shqipëri. Nuk ka asnjë arsye për t’u theksuar. Ne që të vegjël kemi ardhur shpesh në Shqipëri në muajt e verës për pushime dhe që të jemi të sinqertë, në fillim vendimin e prindërve tanë nuk e pritëm mirë, sepse edhe kemi qenë në një moshë më të re atëherë, 13 dhe 15 vjeç. Madje, muajt e parë të qëndrimit tonë këtu ndjeheshim shumë të trishtuar. Por, kushërinjtë tanë, miqtë, shokët e rinj që njohëm këtu na i krijuan të gjitha mundësitë, duke na afruar shumë që ne të mos ndjeheshim të trishtuar. Dalëngadalë u mësuam, madje jemi mësuar shumë mirë. Ardhja jonë në Shqipëri këto pak vitet e fundit ka ndikuar shumë pozitivisht tek ne, sepse, nëse më parë ne vetëm e flisnim gjuhën tonë të bukur shqipe, tani dimë ta shkruajmë e ta lexojmë…  Ndoshta do rikthehemi pas një viti përkohësisht atje, ndoshta… U mësuam shumë mirë këtu, me njerëzit tanë, me miqtë, shokët, të afërmit.

 

Nëse dy vëllezërit do kthehen në USA, e keni menduar se mund të shkrihet grupi juaj, i cili është në sukseset e tij…?

Emiljani: Këtë gjë e kemi menduar dhe diskutuar shumë herë midis nesh. Por unë mendoj se, nëse këta shkojnë përsëri në USA, do shkojnë atje për një kohë të shkurtër dhe do rikthehen përsëri. Por nuk ka asnjë arsye që të ndikojë në grupin tonë për shkrirje apo ndarje të grupit.

 

Sot rryma hip hop është e përhapur në Shqipëri. Si ndjeheni mes kolegëve tuaj të tjerë konkurrues?

Po! Është më se e vërtetë që sot rryma hip hop është e përhapur në Shqipëri, madje ka dalë edhe si modë. Janë krijuar shumë grupe hip hop-i dhe kjo ka rëndësinë dhe përgjegjësinë e të gjitha grupeve, sepse jemi në konkurrencë me njëri tjetrin. Është edhe dëgjuesi, spektatori ai, që të vlerësojnë se cili grup pëlqehet më tepër… më tepër…

 

Çfarë mendoni për të ardhmen tuaj si grup?

Gjithmonë mendojmë që të krijojmë dhe të këndojmë këngë të pëlqyera për dashamirësit e rrymës hip hop. Dëshira jonë është që edhe të aktivizohemi në aktivitetet e ndryshme artistike kombëtare që zhvillohen në Shqipëri…